LDK thotë se do të rehabilitojë dy termocentralet dhe do të rishikojë hidrocentralet
07 Shkurt, 2021
Në kuadër të premtimeve të paraqitura në Programin Qeverisës, Lidhja Demokratike e Kosovës thotë se do të rehabilitojë dy termocentralet në Kosovë si dhe do të bëjë hapjen e mihjes së re të linjitit.
Ndërsa në Kosovën B është duke u implementuar projekti për ndërrim të elektro-filtrave, që njëkohësisht do të mundësojë edhe shtyerjen e jetëgjatësisë së këtij termocentrali, institucione dhe raporte ndërkombëtare kërkojnë dekomisionimin e sa më të shpejtë të Kosovës A.
Komisioni Evropian: Kosova duhet të fillojë përgatitjet për dekomisionimin e termocentralit Kosova A
Një raport i mëhershëm fizibiliteti nga Komisioni Evropian thotë se rehabilitimi i Kosovës A është thjesht, ekonomikisht i parealizueshëm.
Investime në efiçiencë, burime të ripërtëritshme dhe rishikim i licencave të hidrocentraleve
E krahas premtimit për rehabilitim të termocentraleve, LDK ka thënë se do të kufizojë edhe lirimin e gazrave si dhe rishikimin e të gjitha licencave për hidrocentrale dhe gurëthyes.
Përvec tjerash, LDK ka thënë se do të ndihmojë arritjen e cakut prej 25% të energjisë nga burime të ripërtëritshme si dhe do të bëjë liberalizimin e tregut dhe integrimin rajonal të tij.
Në pjesën për energji elektrike në programin qeverisës, LDK ka thënë edhe se do të mbështesë efiçiencën e energjisë dhe do të bëjë zhvillimin e ngrohjes qendrore, pa dhënë shumë detaje.
Ndërsa ndër objektiva, LDK ka thënë edhe se do të bëjë kyçjen e Kosovës në rrjetin ndërkombëtar të gazit natyror.
Ndryshe, përvec LDK-së, edhe Vetëvendosje ka thënë se do të bëjë mirëmbajtjen dhe rehabilitimin e dy termocentraleve ekzistuese ndërsa AAK tani më ka premtuar ndërtimin e dy termocentraleve të reja me nga 300 megavat, një me linjit dhe një me gaz.
Mustafa: Termocentraleve do t’i bëjmë analizë
Në emisionin #debatpernime të prodhuar nga Kallxo.Com, Besian Mustafa nga rradhët e LDK-së kishte thënë se LDK ka për qëllim të bëjë analiza për të shikuar nëse ato duhet të mbyllen ose jo.
“Sa i përket Termocentralit Kosova A dhe B duhet t’u bëjmë analizë se a duhet t’i mbyllim apo jo. Edhe më tej do të përdorim thëngjill, natyrisht do të insistojmë që të përdorim teknologjitë e reja në përdorimin e thëngjillit, por në periudhë afatmesme dhe afatgjatë do të synojmë që të kalojmë në energji të ripërtëritshme”, ka thënë Mustafa në Kallxo.com.
Mustafa ka thënë edhe se në lidhje me burimet e ripërtëritshme, nga tarifat nxitëse që aplikohen tani, Kosova do të fillojë implementimin e ankandeve të hapura.
Kurti zotohet të riparojë kapacitetet ekzistuese energjetike dhe të mbrojë lumenjtë
