Sindikatat në Bullgari kundërshtojnë mbylljen e termocentralit me qymyr

24 Prill, 2024

Në Bullgari po protestohet kundër mbylljes së termocentraleve me qymyr.

Inxhinierët dhe minatorët e termocentralit elektrik “Marica Iztok 2” paraqitën në parlamentin bullgar kërkesën për ndërtimin e një impianti për kapjen e dioksidit të karbonit, me shpresë se kjo do të parandalojë mbylljen e kapaciteteve të prodhimit të energjisë me qymyr.

Kështu tha udhëheqësi i sindikatës së punëtorëve Stanimir Georgiev.

Ai shtoi se sindikatat në Bullgari janë të pakënaqura me ndryshimet në Ligjin për Energji Elektrike, sipas të cilit termocentrali me qymyr “Marica Iztok 2” duhet të ndërprejë prodhimin nga 1 korriku 2024.

Sipas Georgiev, Bullgaria duhet të jetë e vendosur dhe të negociojë financimin e një impianti të mundshëm të kapjes së dioksidit të karbonit përmes Planit të Rimëkëmbjes dhe Qëndrueshmërisë.

Ai shtoi se ky impiant mund të financohet edhe nga vetë termocentralet me qymyr.

“Gjatë pandemisë së koronavirusit, centralet tona elektrike i fituan këto para për një vit”, kujton Georgiev.

Protestuesit japin shembullin se Rumania, Polonia dhe Suedia kanë rinegociuar tashmë planet e tyre dhe nuk po i mbyllin kapacitetet.