Qeveria ndan 19 milionë euro për subvencionimin e faturave të energjisë

21 Shtator, 2022

Kryeministri Kurti ka njoftuar se në mesin e vendimeve që ka marrë Qeveria e Kosovës janë ndarë gjashtë milionë euro për zbatim të masave të efiçiencës së energjisë dhe 19 milionë euro për subvencionimin e energjisë elektrike për qytetarët me qëllim të uljes së ndikimit të tarifave të energjisë.

Kryeministri i Kosovës, Albin Kurti ka bërë të ditur se në mbledhjen e 97-të të qeverisë janë ndarë 19 milionë euro për subvencionimin e energjisë elektrike për qytetarët, me qëllim të uljes së ndikimit të tarifave të energjisë, si dhe gjashtë milionë euro për zbatim të masave të efiçiencës së energjisë.

“Ndaluam eksportin dhe ri-eksportin e produkteve të drurit si lëndë djegëse”, ka shkruar Kurti në llogarinë e tij në Facebook.

Shefi i ekzekutivit ka njoftuar po ashtu se është miratuar dyfishimi i pagesës për përfituesit e skemës së ndihmës sociale për muajin shtator 2022.

Ndryshe të martën e 20 shtatorit, Qeveria e Kosovës ka mbajtur mbledhje elektronike, në të cilën ka aprovuar gjashtë vendime.

Në mesin e vendimeve të tjera janë shpallur me interes të veçantë publik pronat e paluajtshme të cilat janë të nevojshme për realizimin e “Projekteve infrastrukturore për interes publik” në zonat kadastrale: Bërnjak dhe Jasenovik i Epërm në Komunën e Zubin Potokut.