Mali i Zi miraton ligjin për përdorimin e energjisë nga burimet e ripërtëritshme

20 Gusht, 2024

Kuvendi i Malit të Zi ka miratuar Ligjin e parë për Përdorimin e Energjisë nga Burimet e Ripërtëritshme. Ligji përfshin një skemë të re të nxitjes së investimeve në energji të ripërtëritshme.

Ministri i Energjisë, Saša Mujović, tha se qëllimi i ligjit është të reduktojë emetimet e dioksidit të karbonit dhe të rrisë prodhimin e energjisë nga burimet e ripërtëritshme, duke ndihmuar Malin e Zi të përmbushë detyrimet për anëtarësimin në Bashkimin Evropian.

Mujović theksoi se me skemën e re të nxitjes, qeveria nuk do të jetë më e detyruar të blejë energjinë e ripërtëritshme, duke ulur ndjeshëm kostot për qytetarët. Energjia do të shitet në treg, dhe ligji gjithashtu parashikon futjen e ankandeve për projekte të ripërtëritshme.

Banka Evropiane për Rindërtim dhe Zhvillim (BERZH), e cila këshilloi qeverinë në hartimin e ligjit, ka deklaruar më herët se pret që Mali i Zi të nisë ankandet e para për burime të ripërtëritshme deri në vitin 2025.