Fermerët në Shqipëri kundërshtojnë termocentralin me gaz

22 Prill, 2024

Fermerët e fshatrave të Roskovecit e Dimalit në Shqipëri kanë protestuar mesditën e së dieles kundër ndërtimit të termocentralit me gaz në fshatin Suk 1.

Me pankarta në duar, në mes të shiut, fermerët shprehen se tentativa e bashkisë së Roskovecit për t’i hapur rrugën ndërtimit të këtij termocentrali në zonën bujqësore është kriminale.

Prania e termocentralit do të shkatërrojë një sipërfaqe bujqësore prej 700 hektarë me sera, tha një banor. Sipas tyre jo vetëm toka, uji, por edhe ajri do të ndotet.

Ne jemi të vendosur për të ndaluar këtë ndërtim”, tha një prej fermerëve në protestë.

“I bëj thirrje kryetares së bashkisë që duhet të na bëjë sa më parë transparent këtë projekt sepse unë jam banor i këtij komuniteti, fermer. Të na bëhet transparent investimi në të kundërt ne do jemi në greva të vazhdueshme duke shkuar deri në kryeministri. Dëmtohen 70 hektarë sera. Jemi e vetmja zona e paprekur. I lutem kryetares së bashkisë të heqë dorë nga projekti”, u shpreh një fermer.

“Ky termocentral dëmton të gjithë zonën tonë. Si do jetojmë nëse helmohemi çdo ditë. Do të bëjmë edhe greva urie”, shtoi një tjetër.

Firma shqiptare që kërkon të ndërtojë termocentralin është Gener 2. Por krahas kundërshtisë nga ana e banorëve ndërtimi i këtij termocentrali ka ngjallur debate të ashpra edhe në mbledhjen e fundit të Këshillit Bashkiak. Këshilltarët e djathtë Dhurata Malka e Fredi Feleqi kanë bërë thirrje edhe këshilltarëve që votuan pro, ta kundërshtojnë këtë investim që për ta do të krijojë probleme.

Banorët paralajmërojnë se protestat kundër ndërtimit të këtij termocentrali do të vazhdojnë.