Mustafa: Bilfinger nuk ka ofruar asgjë më shumë sesa 15-20 faqe PowerPoint për rindërtimin e Kosova A
24 Janar, 2022
Ish-kryeministri i vendit, Isa Mustafa, ka thënë se përfaqësuesit e Bilfinger janë treguar të painteresuar për rindërtimin e “Kosova A”.
Sipas tij, e gjitha çka kanë ofruar kanë qenë 15-20 faqe PowerPoint.
“Është e vërtetë se në takimin tim, si Kryeministër me Kancelaren Merkel, më 30 qershor 2015, ndër çështjet e rëndësishme shtroi edhe rindërtimin e Kosova A përmes firmës Bilfinger. Unë shpreha gatishmërinë e plotë ta zhvillojmë këtë projekt. Me angazhimin e Kancelares, të njëjtën ditë , në orët e mbrëmjes, kemi organizuar takim me përfaqësuesit e Bilfinger në Berlin. Kemi kërkuar ta konkretizojnë propozimin e tyre, koston e investimit, kapacitetin dhe burimet e financimit. Përfaqësuesit e Belfinger u zotuan se do të na informojnë brenda 15 ditëve, por nuk na kanë informuar asnjëherë edhe përkundër insistimit të vazhdueshëm të kabinetit tim”, ka shkruar Mustafa në Facebook.
Tahiri: Bilfinger, iniciativa më jo-serioze energjetike e pas-luftës në Kosovë
Ai tha se kanë qenë të interesuar që projektin ta realizojnë me kompaninë Bilfinger, por, sipas Mustafës kompania ka qenë e painteresuar.
“Kompania gjermane Bilfinger nuk ka ofruar asgjë më shumë sesa 15-20 faqe PowerPoint. Kjo është krejt e vërteta për këtë firmë dhe zhurmën që po bëhet për investimet e saj në rindërtimin e Kosova A e që po vazhdojnë edhe sot në Kuvend.
Duke pasur parasysh lidhjet ekonomike me Gjermaninë dhe teknologjinë gjermane në gjenerimin e energjisë elektrikenë Kosovë, ne kemi qenë të interesuar që projektin ta realizojmë së bashku me ta, por kompania Bilfinger është treguar krejtësisht e painteresuar. Krahas kësaj ne kemi vazhduar me Kosovën e Re”, është shprehur tutje Mustafa.
Një nga projektet e shumëpërmendura të mundshme energjetike të Kosovës së pasluftës ishte edhe projekti i kompanisë gjermane Bilfinger, i cili kishte të bënte me rehabilitimin e kapaciteteve ekzistuese të qymyrit në Kosovë, përkatësisht, termocentralit Kosova A.
Nga përfaqësuesit e pozitës, pikërisht mungesa e projektit të Bilfinger është cilësuar si një ndër të metat e sektorit të energjisë. Kryeministri i Kosovës, Albin Kurti, shumë herë e ka përmendur kompaninë gjermane “Bilfinger”, e cila parashihej të rivitalizonte termocentralin “Kosova A”.
Për këtë, Kryeministri e ka akuzuar LDK-në se gjatë kohës kur Isa Mustafa ishte kryeministër, e kishin refuzuar një projekt të tillë.
