Nënshkruhet marrëveshja për subvencionimin e tarifës për BRE-të
21 Janar, 2021
Ministri i Ekonomisë dhe Ambientit, Muharrem Nitaj ka nënshkruar marrëveshje me Zyrën e Rregullatorit të Energjisë (ZRRE) me Operatorin e Sistemit dhe Transmisionit (KOSTT), si dhe me KESCO-n për implementimin e Ligjit për Rimëkëmbjen Ekonomike – COVID 19, për subvencionimin e tarifës për Burimet e Energjisë së Ripërtëritshme (BRRE).
Sipas marrëveshjes, si pjesë e masave për rimëkëmbje ekonomike për pesë muaj prodhimi i energjisë elektrike nga burimet e ripërtëritshme në Kosovë do të subvencionohet nga Qeveria e Republikës së Kosovës.
Ministri Nitaj theksoi se situata e krijuar nga pandemia globale ka bërë që të prekën të gjithë sektorët në Kosovë, e nga kjo kjo situatë nuk është imun as sektori i energjisë andaj e kemi për detyrë si Qeveri që të kujdesemi për qytetarët tanë.
“Subvencionimi i tarifës së Burimeve të Energjisë së Ripërtëritshme për të gjithë konsumatorët edhe pse për periudhë 5 mujore do të ndihmojë në tejkalimin e situatës në këtë kohë të pandemisë si dhe do të ndikojë në mirëqenien e qytetarëve”, tha ministri Nitaj.
Ndërsa nga ana e tyre përfaqësuesit e ZRRE-së, KOSTT-it dhe KESCO u shprehën se ky subvencionim edhe pse për periudhë të caktuar është shumë domethënës për konsumatorët, është gjithashtu i përshtatshëm si dhe i duhur për konsumatorët në këtë kohë të pandemisë.
