Maj 2024: Prodhimi nga termocentralet rritet për 41,5%, bie prodhimi nga burimet e ripërtëritshme
22 Korrik, 2024
![](https://kosovo.energy/wp-content/uploads/2022/02/xshutterstock_1378145228.jpg.pagespeed.ic.7MQxu6Fya6.jpg)
Agjencia e Statistikave të Kosovës (ASK) ka publikuar statistikat për muajin maj 2024 me të dhëna për prodhimin dhe konsumin e thëngjillit, prodhimin dhe konsumin e energjisë, importin dhe eksportin e energjisë, si dhe importin dhe eksportin e energjentëve tjerë.
Sipas statistikave të publikuara, në maj 2024 prodhimi i rrymës nga termocentralet me qymyr në Kosovë është rritur për 41,47%, krahasuar me muajin maj të vitit 2023, ndërsa prodhimi nga hidrocentralet ka rënë për 25,30% dhe nga burimet e erës dhe atyre solare për 20,95%.
Më shumë energji elektrike e konsumuar në muajin maj 2024 sesa në muajin maj 2023
Gjatë muajit maj të vitit 2024, energjia elektrike bruto në dispozicion ishte 491.61 GWh, kurse konsumi i energjisë elektrike ishte 476.46 GWh ose 29,26% më shumë sesa në muajin e njëjtë të vitit paraprak.
Tutje thuhet në raport se pjesëmarrja e energjisë elektrike alternative në kuadër të konsumit të përgjithshëm ishte 13,81%.
Në maj 2024 ka 46,75% më pak importe se në maj 2023
Importi i energjisë elektrike në maj të vitit 2024 ishte 149.21 GWh, kurse eksporti i energjisë elektrike në të njëjtën periudhë ishte 299.68 GWh (këtu është përfshirë edhe sasia e transmisionit).
“Prodhimi i thëngjillit ishte rreth 699.49 mijë ton ose 20,06% më shumë sesa në muajin e njëjtë të vitit paraprak”, thuhet në njoftimin e ASK-së.