Ejupi: Me 6 milion investim në efiçencë shteti po fiton 12 milion, po me 60 milion?
October 10, 2022
Ekspertë të sektorit të energjisë dhe përfaqësues të shoqërisë civile ishin të ftuar në emisionin Rubikon në Klan Kosova për të diskutuar mbi gjendjen aktuale dhe zhvillimet në sektorin e energjisë në vend.
Në qendër të vëmendjes ishte pakoja e subvencionimit të efiçiencës së energjisë, që u prezantua nga ministrja e Ekonomisë, Artane Rizvanolli.
Shumë nga panelistët e mirëpritën vendimin, megjithatë të gjithë ranë dakord se shuma e subvencionit është mjaft e vogël për të pasur një ndikim të rëndësishëm duke pasur parasysh se vendi përballet me efektet e krizës energjetike në muajt e ardhshëm të dimrit, duke e etiketuar nismën “si të vonshme”.
Burim Ejupi, nga Instituti për Politika Zhvillimore, INDEP, vuri në dukje se Kosova është i vetmi vend në rajonin e Ballkanit Perëndimor që ka krijuar një fond për efiçencën e energjisë, por buxheti i saj nuk ka lëvizur që nga formimi i saj.
Në këtë kuptim, Ejupi diskutoi për subvencionin e qeverisë prej 6 milionë eurosh nga i cili pritet të përfitojnë 10 mijë familje kosovare.
Kreu i INDEP-it e përshëndeti nismën, por se shuma totale e ndihmës mbetet për të dëshiruar.
“8 shkurt, tani janë bërë 8 muaj nuk është bërë asgjë. Mirë që ka bërë dicka qeveria sepse parp se prap duhet me përshendet këtë”, tha Ejupi.
Kryeziu: Projekti i gazit u refuzua, do të ishte ura e tranzicionit energjetik për vendin
“Rryma duhet të shtrenjtohet, dhe ka me u shtrenjtu, duhet njëkohësisht të veprojmë me masa të efiçensës”, tha ai.
“Kosova është një vend në Ballkanin Perëndimor që ka fond të efiçensës, nëse e sheh bugjet i fondit të efiçensës është 1 milion, 1 milion ka qenë edhe pa u themelu fondi”, tha ai.
“Nëse e marrim seriozisht me investu në efiçensë, është dashur me u ndryshu ligji. Ne kemi bërë edhe studime, janë vecse gati studimet, ne si institut nga viti 2019 kërkojmë nga qeveria që ta largojë TVSH-në për panele solare, për shtëpi individuale. Kjo do të kishte liruar koston për 18%”, tha ai ndër të tjera.
Duke marrë parasysh se Qeveria e Kosovës nënvizoi se vendi do të kursejë deri në 12 milionë euro nga efektet e këtyre subvencioneve të efikasitetit, Ejupi ka shpjeguar se nëse Qeveria e Kosovës do të kishte investuar 60 milionë e jo 6 milionë, atëherë efektet do të ishin dhjetëfish.
Kjo është një llogaritje interesante, pasi përfitimi duket se e mbipeshon shumë investimin.
Me këto përllogaritje, Ejupi theksoi se Kosova ka mundur t’i kapërcejë edhe temperaturat e ulëta të dimrit vetëm me gjenerimin ekzistues të energjisë elektrike në vend, e gjithë kjo për shkak të rënies së konsiderueshme të konsumit përmes masave të efiçiencës.
“Momentalisht gjatë bisedave që kemi pasur me instalues dhe prodhues të paneleve solare në Kosovë, vet vetdijësimi i qytetarëve janë instaluar gjatë këtij viti diku rreth 10MW”, tha Ejupi.
“Qytetarët e Kosovës vecse i kanë në banka 5 miliard euro, me një subvencion ato para do kishe mundur me i fut në ekonomi”, theksoi ai.
“A ka pasur qeveria para? Gjatë prillit i ka shpërndarë 150 milion, në forma të subvencioneve të tjera, do të thotë nëse do të kishin hyrë të paktën 60 milion në efiçensë të energjisë besoj që gjatë kësaj kohe ndoshta do të kishim përballuar edhe dimrin me prodhim vendor ai që është që arrinë diku maksimum deri në 1000 megavatë për orë”, theksoi ai.
“Nëse qeveria do të bënte thirrje, jo këto 6 milion, por vetëm nëse do të kishte shtuar një 0, ministrja e përmendi që me 6 milion shteti do të fitojë 12 milion, pse nuk i investon 60 milion që shteti me i fitu 120 milion?”, tha Ejupi.
