Serbi, BERZH mundëson kredi 30 milionë euro
August 12, 2024
Banka Europiane për Rindërtim dhe Zhvillim (BERZH) do t’i japë Serbisë një kredi deri në 30 milionë euro për financimin e investimeve në prodhimin e nxehtësisë së ripërtëritshme, në disa kompani të ngrohjes qendrore në vend, së bashku me masat e lidhura me efikasitetin e energjisë, duke përfshirë modernizimin e ngrohjes, nënstacionet dhe rrjetet e ngrohjes qendrore.
Projekti do të mbështetet nga financimet e donatorëve që shkojnë deri në 12 milionë euro, dhe që janë mobilizuar nga BERZH nëpërmjet Sekretariatit Shtetëror Zviceran për Çështjet Ekonomike, Bashkimit Europian, në kuadër të Programit Rajonal të Efikasitetit të Energjisë dhe qeverisë austriake.
Plani do të zbatohet nga Ministria e Minierave dhe Energjetikës, në bashkëpunim me bashkitë pjesëmarrëse dhe kompanitë e ngrohjes qendrore.
Në nënshkrimin e kredisë morën pjesë ministri i Financave, Siniša Mali, dhe ministrja e Minierave dhe Energjetikës, Dubravka Đedović Handanović, si dhe presidentja e BERZH-it, Odile Renaud-Basso, e cila nënshkroi marrëveshjen në emër të bankës.
Të pranishëm në nënshkrim ishin edhe H.E. Urs Schmid, ambasadori i Zvicrës në Serbi dhe Christian Ebner, ambasador i Austrisë në Serbi dhe Elvira Angulo Rodrigues, shefe e operacioneve në misionin e BE-së në Serbi.
Ministri i Financave, Siniša Mali, tha: “Nënshkrimi i kësaj kontrate është jashtëzakonisht i rëndësishëm për Republikën e Serbisë, sepse, në këtë mënyrë, ne po kontribuojmë për një mjedis më të shëndetshëm përmes përmirësimit të cilësisë së ajrit, përdorimit të burimeve të ripërtëritshme të energjisë dhe rritjen e efikasitetit të energjisë.
Në të ardhmen, do të vazhdojmë të investojmë në sektorin energjetik, ku do të realizojmë investime të mëdha në programin “Përparimi drejt të ardhmes – Serbia 2027”, duke siguruar kështu sigurinë e furnizimit dhe zhvillimin e përshpejtuar të ekonomisë sonë. Investimet në një mjedis më të shëndetshëm, të cilat kontribuojnë drejtpërdrejt në përmirësimin e cilësisë së jetës së qytetarëve, mbeten në krye të përparësive të qeverisë serbe dhe ne do të vazhdojmë me investime në atë fushë”.
/monitor.al
