Scholzi e Vuçiqi nënshkruajnë marrëveshje për “lëndët e para”
July 22, 2024
Kancelari gjerman Olaf Scholz dhe presidenti serb Aleksandar Vuçiq të premten në Beograd kanë nënshkruar memorandum mirëkuptimi mes Bashkimit Evropian dhe Serbisë për partneritetin strategjik për lëndët e para.
Gjatë nënshkrimit të marrëveshjes, Scholzi ka thënë se projekti “Jadar” është i mirë për Serbinë dhe zhvillimin e saj.
“Më jep kënaqësi të madhe që jam këtu në Beograd për një rast të gëzueshëm. Ne nënshkruam marrëveshje të rëndësishme për lëndët e para dhe kjo është diçka që duhet të vlerësohet. Ne duhet të zbulojmë lëndë të para në të gjithë botën. Më vjen mirë që ky vendim u mor në kohën e duhur, mbi të gjitha, ne kemi nevojë për bateri, dhe projekti ‘Jadar’ është para së gjithash i mirë për Serbinë dhe për mbrojtjen e të gjithë rajonit. Ne do ta ndihmojmë këtë të ndodhë. Kjo do të krijojë një jetë më të mirë për qytetarët sepse do të zhvillohet me masa mjedisore dhe ka një rëndësi të madhe për të ardhmen”, u shpreh Scholz, duke avokuar për integrimin e vendeve të Ballkanit Perëndimor në BE.
Vuçiqi u shpreh se kjo marrëveshje do t’i sjellë Serbisë së paku 6 miliardë euro investime të reja. Ai garantoi se projekti do të zhvillohet nën standardet ekologjike që të mbrohet mjedisi.
Marrëveshja nënkupton importimin e mineraleve, përfshirë litiumin, nga Serbia në Bashkimin Evropian të cilat janë kritike për tranzicionin digjital dhe të gjelbër të bllokut. Litiumi është veçanërisht i nevojshëm për prodhimin e automjeteve elektrike dhe Gjermania, si prodhuesja më e madhe në Evropë, ka interes të madh në sigurimin e tij.
Miniera e Jadarit, pranë qytetit të Lloznicës në Serbinë perëndimore, mban disa nga rezervat më të mëdha të litiumit në Evropë. Aty do të zhvillohet projekti i nënshkruar mes BE-së dhe Serbisë.
Nxjerrja e mineraleve nga miniera e Jadarit ishte planifikuar vite më herët, por ishte ndaluar për shkak të protestave të qytetarëve. Gjykata Kushtetuese në Serbi më pas dha leje që punimet mund të vazhdojnë.
