Rumania jep 28 milionë euro grante për efiqiencë energjetike në sektorin industrial

August 12, 2024

Ministria e Energjisë e Rumanisë njoftoi se ka nënshkruar 27 kontrata financimi me vlerë 27.8 milionë euro për efiqiencë energjetike në sektorin industrial.

Financimi, i siguruar përmes fondeve evropiane të alokuara në kuadër të Planit Kombëtar të Rimëkembjes dhe Rezistencës, do të ndihmojë përfituesit e granteve të menaxhojnë më mirë kostot e energjisë dhe të rrisin prodhimin, tha ministri i energjisë Sebastian Burduja në një komunikatë për shtyp.

“Investimet në modernizimin e pajisjeve dhe zbatimin e sistemeve të menaxhimit të energjisë do të sjellin përfitime të mëdha: uljen e konsumit të energjisë deri në 70%, reduktimin e emetimeve të karbonit dhe, shumë e rëndësishme, rritjen e konkurrueshmërisë së ekonomisë rumune” tha Burduja.

Pjesa për efiqiencë energjetike në sektorin industrial në kuadër të
Planit Kombëtar të Rimëkembjes dhe Rezistencës ka një buxhet të përgjithshëm prej 64 milionë eurosh dhe synon optimizimin e proceseve teknologjike, kursimin e energjisë dhe uljen e emetimeve të gazeve serrë me të paktën 30% krahasuar me nivelet para financimit.

Investimet e pranueshme përfshijnë instalimin dhe modernizimin e pajisjeve përkatëse, punimet ndërtimore të lidhura me procesin industrial dhe zbatimin e një sistemi të dedikuar për menaxhimin e konsumit të energjisë.

Javën e kaluar, Ministria e Energjisë e Rumanisë siguroi mbi 2.2 miliardë lei për operatorët e shpërndarjes së energjisë për modernizimin e rrjetit, si dhe 66.56 milionë lei për universitetet dhe bashkitë për zhvillimin e burimeve të energjisë së rinovueshme dhe të ruajtjes së energjisë.

Ky financim u sigurua përmes Fondit të Modernizimit.