Rumania do të ndajë kapacitete të kyçjes në rrjet përmes ankandeve

August 12, 2024

Autoriteti Rregullator i Energjisë i Rumanisë (ANRE) po zgjidh ngërçin e mbingarkesës së rrjetit duke futur një proces konkurrues për alokimin e kapaciteteve për projektet e impianteve për prodhimin e rrymës.

Për vite me radhë, investitorët, autoritetet qeveritare dhe operatorët e rrjetit kanë paralajmëruar se mbingarkesa e rrjetit dhe projektet spekulative të energjisë së rinovueshme janë ndër pengesat kryesore për tranzicionin energjetik.

Ndërkohë që vendet në Evropë dhe më gjerë po nxitohen të tërheqin investime të tilla me stimuj, shpesh anashkalojnë dixhitalizimin, linjat e transmetimit dhe transformatorët, raporton Balkan Green Energy News.

Rumania vendosi të imponojë garanci financiare dhe të detyrojë zhvilluesit të konkurrojnë për qasje në kapacitetet e rrjetit.

ANRE publikoi një metodologji të re për alokimin e kapaciteteve. Rritja e projekteve, veçanërisht për energjinë e erës dhe diellit, po tejkalon aftësinë aktuale dhe të planifikuar për t’i integruar ato në sistemin e energjisë elektrike.

Ankandet për kapacitetin e rrjetit fillojnë në vitin 2026

Zhvilluesit e projekteve më të mëdha se 1 MW tani janë të detyruar të paraqesin garanci në vlerë 5% të tarifës së kyqjes përpara se të marrin miratimin teknik të lidhjes.

Nga fillimi i vitit 2026, kompanitë që planifikojnë të instalojnë impiante prodhimi dhe konsumimi, si dhe njësi ruajtjeje energjie prej 5 MW ose më shumë, do të mund të marrin akses në rrjet vetëm përmes ankandeve, përcjell Kosovo.Energy.

Operatorit të sistemit të transmetimit të Rumanisë, Transelectrica, i është dhënë detyra të publikojë kapacitetin e disponueshëm për çdo zonë çdo vit deri më 15 janar. Ky institucion do të përcaktojë çmimin fillestar në varësi të kostove të zhvillimit të nevojshëm të rrjetit.

Kompanitë dorëzojnë aplikimet duke përfshirë segmentin e sistemit të shpërndarjes së energjisë deri më 28 ose 29 shkurt.

Transelectrica duhet të publikojë një studim çdo vit deri më 15 qershor, duke zbuluar kapacitetet e disponueshme, çmimin fillestar dhe datat e ofertave.

Ankandet fillojnë më 1 korrik për çdo vit të një periudhe dhjetëvjeçare, duke filluar nga viti i dytë kalendarik pas ankandit.

Penalizime për operatorët e rrjetit dhe zhvilluesit

Masat janë prezantuar për të përmirësuar parashikueshmërinë, sipas ANRE. Ato përfshijnë penalizime për vonesat, si për operatorët e rrjetit ashtu edhe për prodhuesit e mundshëm.

Proçedurat e ankandeve do të drejtohen për operatorët e rrjetit për investime në përmirësimin dhe zgjerimin e rrjetit.

Parlamenti i Rumanisë votoi së fundmi për të futur një detyrim që prosumerët të shtojnë sisteme të ruajtjes së energjisë elektrike.