Përurohet ferma e erës e ndërtuar nga Kina në Kroaci

23 Dhjetor, 2021

Ferma e erës e ndërtuar nga një kompani kineze në Kroaci u përurua zyrtarisht.

Ferma, e ndërtuar nga kompania kineze Norinco International, me kapacitet total prej 156 MW, në një sipërfaqe prej 42.8 km2, pritet të prodhojë rreth 530 milionë kilovat-orë (kWh) energji elektrike të gjelbër çdo vit dhe të reduktojë emetimet e dioksidit të karbonit në vend me rreth 460,000 ton në vit, përcjell Monitor.al.

Ferma në Senj, një qytet në bregun e Adriatikut në Kroacinë Perëndimore, është me rëndësi kyçe për sektorin e energjisë së pastër dhe të rinovueshme në qytet dhe në Kroaci në përgjithësi, tha kryeministri kroat Andrej Plenkovic në ceremoninë e përurimit.

Norinco është bërë një nga investitorët më të mëdhenj në ekonominë e gjelbër të Kroacisë dhe nëpërmjet këtij investimi, vendi do të jetë në gjendje të rrisë sasinë e energjisë së rinovueshme që gjeneron, tha Plenkovic.

Kryeministri vlerësoi edhe marrëdhëniet e mira midis dy vendeve dhe rritjen e tregtisë dypalëshe këtë vit, që pritet të kalojë nivelin 1.4 miliardë dollarë amerikanë të shënuar në vitin e kaluar. Ai e falënderoi Kinën për dorëzimin e pajisjeve mjekësore në Kroaci për të përballuar pandeminë COVID-19.

Ambasadori kinez Qi Qianjin tha se projekti Senj ishte një moment historik në “bashkëpunimin e gjelbër Kinë-Kroaci dhe Kinë-Europë” dhe se ai luan rol të rëndësishëm në rritjen e prodhimit dhe konsumit të energjisë së pastër në vend.

Partneriteti gjithëpërfshirës bashkëpunues kino-kroat ka forcuar më tej besimin e ndërsjellë, tha ambasadori, duke shtuar se të dyja vendet do të festojnë 30-vjetorin e krijimit të marrëdhënieve diplomatike vitin e ardhshëm.

“Shpresoj se do të ketë edhe më shumë projekte të bashkëpunimit Kinë-Kroaci, duke arritur përfitime të ndërsjella dhe kontribute më të mëdha në ekonominë dhe shoqërinë lokale, duke forcuar miqësinë midis dy popujve dhe duke konsoliduar dhe duke përmirësuar partneritetin midis dy vendeve.

//Monitor.al