Lagjja Pejton së shpejti s’do të ketë më tela, aty po bëhet eliminimi i rrjetit ajror
February 07, 2024
KEDS ka njoftuar se po vazhdon përpjekjet për zhvendosjen e rrjetit të distribucionit nëntokë, duke eliminuar kësisoji rrjetet ajrore.
Më saktësisht, sot po vazhdon eliminimi i rrjetit ajror në lagjen Pejton në Prishtinë.
‘Me lagjen Pejton, numri i lagjeve të Prishtinës komplet pa tela shkon në katër. Ndërsa, KEDS ka zhdukur telat edhe në qendrat e rreth tridhjetë qyteteve anembanë Kosovës‘, ka shkruar KEDS përmes postimit në rrjete sociale.
‘Në hapa të sigurt, qendrave të qyteteve po u jepet një pamje e hijshme urbane. Për qytete pa tela! Për furnizim të qëndrueshëm e siguri në rrjet‘, kanë shkruar ata në përfundim të postimit.
