Ka filluar ndërtimi i centralit të parë hibrid të BRE-ve në Bullgari
September 21, 2023
Leximi i këtij artikulli zgjatë: 4 minuta
Centrali hibrid Tenevo, i pari në Bullgari, do të përbëhet nga një park diellor, një park i erës dhe një sistem i baterive.
Eurowind Energy dhe Renalfa IPP kanë njoftuar fillimin e ndërtimit të parkut fotovoltaik të centralit, i planifikuar me 238 MW kapacitet maksimal.
Tenevo Solar, që pritet të përfundojë në fillim të vitit 2025, është faza e parë e kompleksit hibrid të energjisë së ripërtëritshme Tenevo – e para në Bullgari. Me një kapacitet maksimal prej 238 MW, parku pritet të bëhet sistemi më i madh fotovoltaik në vend, raporton Balkan Green Energy News.
Eurowind Energy dhe Renalfa IPP me bazë në Danimarkë, dhe seli në Vjenë, shënuan fillimin e ndërtimit të segmentit të energjisë diellore në vendin e një aeroporti të vjetër ushtarak pranë fshatit Tenevo. Ata po zbatojnë projektin në provincën Yambol në juglindje të Bullgarisë përmes sipërmarrjes së tyre të përbashkët EURA IPP.
Kompleksi parashikohet të përfshijë një park me erë më shumë se 250 MW. Është planifikuar gjithashtu një sistem i ruajtjes së energjisë prej 250 MW në fuqi operative dhe 500 MWh në kapacitet. Kjo do të thotë se bateritë do të jenë në gjendje të furnizojnë energji elektrike maksimumi për dy orë.
Projekti ka siguruar tashmë një lidhje me rrjetin për nënprojektin e ruajtjes së baterive, gjë që është e rrallë në Bullgari. Centrali hibrid është planifikuar të lidhet me një linjë transmetimi 400 kV.
Eurowind Energy u themelua në vitin 2006. Ajo projekton, ndërton dhe operon kapacitete energjetike në 15 vende evropiane dhe në Shtetet e Bashkuara. Kompania tha se ka ndërtuar më shumë se 2.5 GW në Evropë deri më tani.
Renalfa IPP është një sipërmarrje e përbashkët e Renalfa Solarpro Group dhe menaxherit të fondit francez të infrastrukturës RGreen Invest. Kompania zotëron objekte të energjisë së ripërtëritshme prej mbi 450 MW në total në Bullgari, Hungari, Maqedoninë e Veriut dhe Rumani. Përveç kësaj, më shumë se 1 GW është në një fazë të avancuar zhvillimi dhe ndërtimi, tha Renalfa.
//Balkan Green Energy News
