Çmimet e derivateve të naftës: Inspektorati nëmbikëqyrje intensive në treg

March 10, 2026

Inspektorati Qendror i Mbikëqyrjes së Tregut, pranë Ministrisë së Industrisë, Ndërmarrësisë, Tregtisë dhe Inovacionit ka njoftuar se në kuadër të monitorimit të vazhdueshëm të tregut të derivateve të naftës, është duke realizuar mbikëqyrje intensive.

Kjo është e lidhur me zbatimin e Vendimit për rregullimin e përkohshëm të çmimeve dhe caktimin e masave të tjera mbrojtëse me qëllim të mbrojtjes së konsumatorit, rritjen e transparencës, mbrojtjen e konkurrencës së ndershme si dhe mënjanimin e çrregullimeve në treg.

Sipas një njoftimi për media bëhet e ditur se Inspektorati Qendror i Mbikëqyrjes së Tregut së bashku me Administratën Tatimore të Kosovës është duke realizuar analiza të të dhënave lidhur me çmimet e importit dhe çmimet e ekspozuara për konsumatorët në tregun vendor.

Sipas të dhënave zyrtare të siguruara nga evidencat e Doganës, çmimi mesatar i importit për derivatet e naftës gjatë ditës së shtunë (datë: 07.03.2026), ka qenë si në vijim: naftë (Dizel): 1.40 €/litër, benzinë: 1.14 €/litër.

Tutje bëhet e ditur se bazuar në monitorimin e realizuar në tregun vendor nga dita e shtunë e deri më tani, çmimet e ekspozuara për konsumatorët në pikat e shitjes me pakicë rezultojnë si më poshtë: naftë (Dizel): nga 1.39 €/litër deri në 1.55 €/litë, benzinë: nga 1.27 €/litër deri në 1.32 €/litër.

Ndërkaq, siç thuhet në njoftim bazuar në vendimin e datës 04.03.2026 për rregullimin e përkohshëm të çmimeve dhe caktimit të masave të tjera mbrojtëse është vendosur marzha tregtare maksimale e lejuar si vijon: dy eurocentë për litër të produktit të shitur me shumicë, dhe 12 eurocentë për litër të produktit të shitur me pakicë.

“Marzhë tregtare domethënë ndryshimi mes çmimit të shitjes dhe çmimit të furnizimit. Inspektorati Qendror i Mbikëqyrjes së Tregut ka qenë në terren gjatë vikendit edhe gjatë ditëve të javës së kaluar, IQMT do të vazhdojë të monitorojë dhe inspektojë në mënyrë intensive zhvillimet në tregun e derivateve të naftës e po ashtu edhe inspektimin në pajisje matëse, së bashku me Doganën e Kosovës, Administratën Tatimore të Kosovës, si dhe Autoritetin e Konkurrencës së Kosovës. Kështu që në të gjitha rastet ku identifikohen parregullsi eventuale, si mos respektim i vendimit të marzhës apo praktikave që mund të dëmtojnë konkurrencën dhe konsumatorët, do të ndërmerren masa rigoroze të parapara me legjislacionin në fuqi. Për çdo zhvillim të mëtejmë, qytetarët e Republikës së Kosovës do të njoftohet me kohë”, thuhet në njoftim.

Gjendja ndërkombtare e tregut të naftës

Tregjet e aksioneve kanë rënë dhe çmimet globale të naftës janë rritur mbi 100 dollarë për fuçi, ndërsa lufta në rritje SHBA-Izrael me Iranin ka nxitur frikën e ndërprerjeve të zgjatura të dërgesave përmes Ngushticës së Hormuzit.

Rreth një e pesta e furnizimit botëror me naftë zakonisht transportohet përmes Ngushticës së Hormuzit. Por trafiku përmes kalimit të ngushtë është ndalur pothuajse që nga fillimi i luftës një javë më parë.

Irani të dielën emëroi Mojtaba Khamenei-n për të pasuar babanë e tij Ali Khamenei si udhëheqës suprem, duke sinjalizuar se një javë pas konfliktit, ekstremistët mbeten në krye të vendit. Ndërsa SHBA-të dhe Izraeli nisën valë të reja sulmesh ajrore në të gjithë Iranin gjatë fundjavës, duke goditur objektiva të shumtë, përfshirë depot e naftës.

Një ndërprerje e madhe e furnizimit me energji nga rajoni kërcënon të rrisë çmimet për konsumatorët dhe bizneset në të gjithë botën, transmeton Telegrafi.

Të hënën në mëngjes në Azi, nafta e papërpunuar Brent ishte pothuajse 24% më e lartë në 114.74$, ndërsa nafta e lehtë Nymex u rrit me më shumë se 26% në 114.78$.

Tregjet e aksioneve në rajonin e Azi-Paqësorit ranë ndjeshëm në tregtinë e mëngjesit, me indeksin Nikkei 225 të Japonisë që ra me më shumë se 7%, Hang Seng në Hong Kong që humbi mbi 3% dhe ASX 200 në Australi që ra me më shumë se 4% më pak.

Indeksi Kospi i Koresë së Jugut, i cili është goditur veçanërisht rëndë që nga fillimi i konfliktit, ra me më shumë se 8%, duke shkaktuar një ndalesë 20-minutëshe të tregtisë.

/Telegrafi