Aktivistët e grupit “Asnjë cent më shumë” bllokojnë objektin e ZRRE-së për këtë arrestohen

April 03, 2025

Aktivistët e grupit “Asnjë cent më shumë” kanë bllokuar derën e objektit të ZRRE dhe për këtë akt janë arrestuar nga policia.

Ata nuk po i lënë punëtorët që të hyjnë brenda, derisa “ZRRE-ja të merr vendimin për mos rritjen e çmimit të energjisë për 15 për qind”, raporton KosovaPress.

Aktivisti i grupit “asnjë cent me shumë”, Auron Doli tha se nuk do të largohen nga objekti.

“Sot kemi vendosur me e blloku ZRRE-në, për shkak të propozimit me e rritë çmimin e energjisë elektrike për 15 për qind. ZRRE-ja do të mbes në bllokadë, përderisa anëtarët e bordit të saj nuk zotohen që me anulu këtë propozimvendim”, tha ai.

Mirëpo si pasoj e kësaj bllokade aktivistët arrestuar sot nga Policia e Kosovës.

Në një reagim për media “Asnjë cent më shumë” thekson se policia arrestoi brutalisht 12 qytetarë.

“Pas Presidentes, Ministrisë së Ekonomisë dhe ZRRE-së, stafeta kaloi te Policia e Kosovës. Të gjithë në mbrojtje të interesit privat. Të gjithë bashkë në ruajtjen dhe garantimin e përfitimeve të KEDS-it. Presidentja e Qeveria përmes ZRRE-së, përmes propozimeve dhe vendimeve politike kurse policia e Kosovës përmes grushtave dhe shufrave metalike”, thuhet në reagim.

Tutje në reagim thuhet se në orën 08:00 kur edhe fillon orari zyrtar i punës së ZRRE-së, aktivistët/et e iniciativës “Asnjë Cent Ma Shumë” bllokuan zyret e ZRRE-së.

“Me zell të pakuptueshëm nga ana e pjesëtarëve të policisë, janë arrestuar dhe rrahur 12 aktivistë/e. Janë rrahur egërsisht vetëm pse po protestonin kundër rritjes edhe ashtu të rritur të çmimit të energjisë. Të rrahur/a dhe të arrestuar/a po mbahen në polici. Ne kërkojmë lirimin e menjëhershëm të tyre, kurse qytetarët/et i ftojmë të na bashkohen te zyrat e ZREE-së. Asnjë zyrtar i ZRRE nuk mund të punojë aty”, thuhet në reagim.

Grupi “Asnjë cent më shumë” ka shtuar se do të vazhdojnë të kundërshtojnë rritjen e çmimit të energjisë elektrike.

“Jo deri në një zotim se nuk kanë për të aprovuar asnjë rritje. Deri atëherë ai nuk është vendi i tyre i punës. Deri atëherë ne jemi dhe duhet te jemi në bllokadë”, thuhet në reagim.

Pas këtyre polemikave Zyra e Rregullatorit të Energjisë Elektrike ka reaguar. ZRRE thekson se është e vetëdijshme për shqetësimet e qytetarëve lidhur me procesin e tanishëm tarifor, të shprehura sot përmes protestës pranë zyrave të ZRRE-së.

“ZRRE respekton të drejtën e qytetarëve për të protestuar në mënyrë paqësore, si një e drejtë e garantuar nga ligjet e Republikës së Kosovës.

ZRRE në vazhdimësi angazhohet për një proces të hapur, të drejtë dhe transparent në shqyrtimin e çdo komenti nga qytetarët dhe palët e interesuara, duke siguruar që çdo vendim të merret në përputhje me legjislacionin ne fuqi.

Andaj, kërkojmë mirëkuptimin e qytetarëve për të mos penguar ushtrimin e detyrave të ZRRE, konform mandatit te saj”, thuhet në reagim.

/Telegrafi