Varhelyi: Shpërndarja e 500 milionë eurove të para për energji do të fillojë në janar
07 Dhjetor, 2022
Samiti i parë BE-Ballkani Perëndimor që zhvillohet në rajon, sipas një deklarate për shtyp të komisionerit të BE-së për Fqinjësinë dhe Zgjerimin, Oliver Varhelyi, është moment historik dhe është diçka që duhej bërë shumë kohë më parë.
Në deklaratën për shtyp, Varhelyi konfirmoi se BE ka ofruar një paketë të mbështetjes për energjinë prej 1 miliardë eurosh me masa të menjëhershme dhe afatshkurtëra deri në afatmesme, ndërsa fondet do të fillojnë disbursimin që në janar.
“Komisioni miratoi ndihmën e menjëhershme për mbështetjen buxhetore prej 500 milionë euro për të zbutur ndikimin e çmimeve të energjisë në familjet në nevojë dhe kompanitë e vogla dhe të mesme. Ne do të jemi gati për të disbursuar fondet që në janar”, ka theksuar Varhelyi.
Ai ka konfirmuar se paketa e dytë prej 500 milionë eurosh do të mbështesë investimet afatshkurtëra dhe afatmesme në 1-3 vitet e ardhshme.
“Në afat të shkurtër, pas 1-2 viteve, ne do të mbështesim prodhimin e energjisë së rinovueshme dhe ndërlidhjet e energjisë elektrike dhe gazit, duke përfshirë LNG-në, ne duam që të ndërtohet një terminal tjetër LNG në BP”, ka thënë Varhelyi, ndërsa ka shtuar se përmes këtyre fondeve BE synon të diversifikojë furnizimin me rrymë larg Rusisë.
Varhelyi ka thënë se pas 2-3 viteve, BE do të mbështesë projekte në shkallë të gjerë të burimeve të rinovueshme si dhe përkrahje për prosumerët dhe për efiçiencë të energjisë.
“Në afat të mesëm, pas 2-3 viteve, ne do të mbështesim projekte në shkallë të gjerë të burimeve të rinovueshme, solare, centrale me erë, si dhe rinovimin e blloqeve të vjetra të banesave për t’i bërë ato të pavarura nga energjia me izolim dhe gjenerim të energjisë diellore në çatitë e tyre”, ka thënë Varhelyi.
Plani Ekonomik dhe Investues sjellë investime prej 30 miliardë eurosh për rajonin
Plani Ekonomik Investues (EIP) 30 miliardë eurosh do të ndihmojë rajonin në tranzicionin energjetik, ka konfirmuar komisioneri i BE-së për Fqinjësinë dhe Zgjerimin, Oliver Varhelyi.
“Komisioni po vjen në samit me lajme për progrese të konsiderueshme në zbatimin e planeve të tij, me 12 projekte të reja investimi dhe 8 skema garancie kredie të miratuara këtë javë në fushën e energjisë, si pjesë e paketës, por, edhe në transportin hekurudhor dhe ujor, menaxhimin e mbetjeve dhe ujërave të zeza, në fushën e energjisë e laboratorëve inteligjentë digjitalë dhe përmirësimin e infrastrukturës arsimore”, ka thënë Varhelyi.
Kjo paketë e fundit e çon zbatimin e EIP në dy vitet e fundit në 1.8 miliardë euro investime, për financimin e 40 projekteve kryesore me një vlerë prej 5.7 miliardë euro.
